UNYONYAJI WA WAFANYAKAZI WA MAJUMBANI BADO WATAJWA KUWA CHANGAMOTO



Na Jasmine Shamwepu, Habari Kamili Blog-Dodoma. 

MATUKIO ya unyonyaji, mishahara duni na ukosefu wa mikataba ya ajira yameendelea kutajwa kuwa miongoni mwa changamoto zinazoathiri ustawi wa wafanyakazi wa majumbani nchini, hali inayochochea wito wa kuwepo kwa hatua zaidi za kuwalinda.

Hayo yameelezwa na wadau wa sekta ya ajira wakati wa mkutano wa kujadili utekelezaji wa Mkakati wa Taifa wa Kazi za Majumbani wa mwaka 2025/26 hadi 2029/30 uliofanyika jijini Dodoma.

Mwenyekiti wa Chama cha Wafanyakazi wa Majumbani nchini, Zanini Athumani, amesema pamoja na umuhimu wa kazi za majumbani katika jamii, bado baadhi ya wafanyakazi wanakabiliwa na mazingira yasiyozingatia haki zao za msingi.

Amesema changamoto hizo zinajumuisha kucheleweshwa kwa mishahara, kutokuwepo kwa mikataba ya kazi na kukosekana kwa mifumo madhubuti ya kushughulikia malalamiko wanayokumbana nayo.

“Wafanyakazi wengi wa majumbani bado wanahitaji ulinzi zaidi ili waweze kufanya kazi zao kwa usalama na kupata stahiki zao kwa wakati,” amesema.

Kwa upande wake, Mwakilishi Mkazi wa Shirika la CVM, Laura Vallesi, amesema wanawake na wasichana ndio wanaobeba mzigo mkubwa wa changamoto zinazohusiana na kazi za majumbani, hususan katika maeneo ambayo hayana mifumo imara ya ulinzi wa wafanyakazi.

Alisema bado kuna haja ya kuendelea kuelimisha jamii kuhusu haki za wafanyakazi wa majumbani pamoja na madhara ya ajira za watoto na usafirishaji haramu wa binadamu.

Naye Meneja Miradi wa Shirika la Wote Sawa, Jackline Mujunangoma, alisema baadhi ya waathirika wa usafirishaji haramu wa binadamu huishia kufanya kazi za ndani katika mazingira magumu yanayowanyima haki za msingi ikiwemo elimu na usalama.

Amesema mashirika ya kiraia yanaendelea kushirikiana na Serikali katika kuwawezesha waathirika hao kurejea kwenye maisha ya kawaida kupitia elimu, mafunzo ya ufundi na huduma za ushauri.

Katibu Mkuu wa CHODAWU, Said Wamba, amesema kuna umuhimu wa kuendelea kuimarisha mifumo ya ulinzi wa wafanyakazi wa majumbani ili kuhakikisha wanapata haki sawa na wafanyakazi wa sekta nyingine.

Amesema ushirikiano wa wadau mbalimbali umeanza kuzaa matunda katika kuboresha hali ya wafanyakazi hao, lakini bado juhudi zaidi zinahitajika ili kukabiliana na changamoto zilizopo.

Wadau hao wameeleza kuwa utekelezaji wa Mkakati wa Taifa wa Kazi za Majumbani utakuwa chachu ya kuimarisha mazingira ya kazi, kuongeza usalama wa wafanyakazi na kupunguza vitendo vya unyonyaji vinavyoripotiwa katika sekta hiyo.





Maoni

Chapisha Maoni

Machapisho maarufu kutoka blogu hii

MWENYEKITI NAMALULU AWEKWA PEMBENI KUPISHA UCHUNGUZI

Picha
  Na Mwandishi wetu, Simanjiro MWENYEKITI wa kijiji cha Namalulu Wilayani Simanjiro, Mkoani Manyara, Marumai Kirikai amepumzishwa kazi kwa muda wa siku 28 ili kupisha uchunguzi wa matumizi mabaya ya madaraka katika kijiji hicho. Mkuu wa Wilaya ya Simanjiro, Fakii Raphael Lulandala ameunda kamati ya watu saba itakayofanya uchunguzi kwa muda wa siku 24 na baada ya siku 28 endapo  Mwenyekiti huyo atabainika hausiki na tuhuma hizo atarejea kwenye nafasi yake. Lulandala ameyasema hayo wakati akizungumza na wakazi wa kijiji cha Namalulu, baada ya kusikiliza kero, malalamiko na changamoto zao. Ameeleza kwamba hamsimamishi kazi Mwenyekiti huyo ila anapisha uchunguzi kwa muda wa siku 28 na endapo hatakuwa na makosa atarejea tena kwenye nafasi hiyo. "Hausimamishwi kaz ila unakaa pembeni kwa muda wa siku 28 ili kupisha uchunguzi na ofisa mtendaji wa kijiji cha Namalulu Sarafina Olotu ataongoza kijiji kwa kipindi hiki," amesema DC Lulandala. DC Lulandala amewataja wajumbe saba wa kamati ...
Read more »

IGUNGA YAIBUKA MSHINDI WA KWANZA NANENANE TABORA.

Picha
Na Mwandishi Wetu, Tabora.  HALMASHAURI ya Wilaya ya Igunga imeibuka mshindi wa kwanza katika kundi la Mamlaka za Serikali za Mitaa (Tabora na Kigoma) wakati wa Maonesho ya Nanenane mwaka 2025 ngazi ya kanda yaliyofanyika Uwanja wa Maonesho Ipuli - Tabora. Aidha, imeshika nafasi ya pili katika kundi la washindi wa jumla wa mikoa ya Tabora na Kigoma wakati wa Maonesho hayo. Akizungumza baada ya Halfa hiyo, Katibu Tawala wa Wilaya hiyo, Ndug. Elizabeth Rwegasira amempongeza Mkurugenzi wa Halmashauri hiyo, Selwa Hamid kwa ushirikiano mzuri na Mkuu wa Idara ya Kilimo, Mifugo na Uvuvi, Grace Nyamwanji kwa kufanikisha ushindi huo. Kwa upande wa Mkuu wa Idara ya Kilimo, Mifugo na Uvuvi wa Halamshauri hiyo, Grace Nyamwanji amewashukuru na kuwapongeza, Wakuu wa Idara na Vitengo, Watumishi na  Wadau wote waliyoshiriki maonesho hayo kwa sababu wao ndio chachu ya ushindi huo.
Read more »