MATAPELI WATANO WANASWA KWA TUHUMA ZA KUIBA MILIONI 40 TABORA




Na mwandishi wetu, Tabora.

Jeshi la Polisi mkoani Tabora linawashikilia watu watano kwa tuhuma za kuhusika na wizi wa shilingi milioni 40 kutoka kwa mfanyabiashara Fatuma Nasoro, mkazi wa Wilaya ya Kaliua, katika tukio lililotikisa wakazi wa eneo hilo.

Kwa mujibu wa taarifa za awali, watuhumiwa hao walinaswa kufuatia msako maalum ulioendeshwa kwa nyakati tofauti ndani ya mkoa huo, baada ya kubainika kuwa walikuwa wakijihusisha na vitendo vya utapeli huku wakiendelea na maisha yao ya kawaida bila wasiwasi wowote.

Akizungumzia tukio hilo, Mkuu wa Mkoa wa Tabora, Paul Matiko Chacha, amesema miongoni mwa waliokamatwa, wawili wanaotambulika kwa majina ya Marseli Gwasima na Fred Ricardo walitumia mbinu za udanganyifu kwa kujifanya wahudumu wa kampuni ya mawasiliano ya YAS (zamani Tigo).

Ameeleza kuwa kwa kutumia ujanja huo, watuhumiwa walimshawishi mfanyabiashara huyo, anayejihusisha na biashara ya khanga na vitenge wilayani Kaliua, kuwasajili laini yake, hatua iliyowapa mwanya wa kuhamisha fedha kutoka kwenye akaunti yake ya benki na kuzipeleka kwenye namba zao za simu.

Katika msisitizo wake, Mkuu huyo wa Mkoa ameonya kuwa serikali haina uvumilivu kwa vitendo vya uhalifu, akibainisha kuwa hatua kali za kisheria zitachukuliwa dhidi ya wote watakaobainika kujihusisha na matukio kama hayo.

Aidha, ametoa rai kwa wananchi kuwa makini wanapopokea huduma kutoka kwa watu wanaojitambulisha kama mawakala au wahudumu wa kampuni za mawasiliano, na kuhakikisha wanathibitisha uhalali wao ili kuepuka kuingia kwenye mitego ya matapeli.

Naye Kamanda wa Polisi Mkoa wa Tabora, Richard Abwao, amethibitisha kukamatwa kwa watuhumiwa hao, akieleza kuwa wanaendelea kushikiliwa huku uchunguzi zaidi ukiendelea ili kuwafikisha kwenye vyombo vya sheria.

Kwa upande wake, Fatuma Nasoro ameishukuru kamati ya ulinzi na usalama ya mkoa wa Tabora kwa juhudi zilizowezesha kukamatwa kwa watuhumiwa hao, akisisitiza kuwa hatua kali zichukuliwe ili iwe fundisho kwa wengine wanaojihusisha na vitendo vya utapeli.




Maoni

Chapisha Maoni

Machapisho maarufu kutoka blogu hii

MWENYEKITI NAMALULU AWEKWA PEMBENI KUPISHA UCHUNGUZI

Picha
  Na Mwandishi wetu, Simanjiro MWENYEKITI wa kijiji cha Namalulu Wilayani Simanjiro, Mkoani Manyara, Marumai Kirikai amepumzishwa kazi kwa muda wa siku 28 ili kupisha uchunguzi wa matumizi mabaya ya madaraka katika kijiji hicho. Mkuu wa Wilaya ya Simanjiro, Fakii Raphael Lulandala ameunda kamati ya watu saba itakayofanya uchunguzi kwa muda wa siku 24 na baada ya siku 28 endapo  Mwenyekiti huyo atabainika hausiki na tuhuma hizo atarejea kwenye nafasi yake. Lulandala ameyasema hayo wakati akizungumza na wakazi wa kijiji cha Namalulu, baada ya kusikiliza kero, malalamiko na changamoto zao. Ameeleza kwamba hamsimamishi kazi Mwenyekiti huyo ila anapisha uchunguzi kwa muda wa siku 28 na endapo hatakuwa na makosa atarejea tena kwenye nafasi hiyo. "Hausimamishwi kaz ila unakaa pembeni kwa muda wa siku 28 ili kupisha uchunguzi na ofisa mtendaji wa kijiji cha Namalulu Sarafina Olotu ataongoza kijiji kwa kipindi hiki," amesema DC Lulandala. DC Lulandala amewataja wajumbe saba wa kamati ...
Read more »

IGUNGA YAIBUKA MSHINDI WA KWANZA NANENANE TABORA.

Picha
Na Mwandishi Wetu, Tabora.  HALMASHAURI ya Wilaya ya Igunga imeibuka mshindi wa kwanza katika kundi la Mamlaka za Serikali za Mitaa (Tabora na Kigoma) wakati wa Maonesho ya Nanenane mwaka 2025 ngazi ya kanda yaliyofanyika Uwanja wa Maonesho Ipuli - Tabora. Aidha, imeshika nafasi ya pili katika kundi la washindi wa jumla wa mikoa ya Tabora na Kigoma wakati wa Maonesho hayo. Akizungumza baada ya Halfa hiyo, Katibu Tawala wa Wilaya hiyo, Ndug. Elizabeth Rwegasira amempongeza Mkurugenzi wa Halmashauri hiyo, Selwa Hamid kwa ushirikiano mzuri na Mkuu wa Idara ya Kilimo, Mifugo na Uvuvi, Grace Nyamwanji kwa kufanikisha ushindi huo. Kwa upande wa Mkuu wa Idara ya Kilimo, Mifugo na Uvuvi wa Halamshauri hiyo, Grace Nyamwanji amewashukuru na kuwapongeza, Wakuu wa Idara na Vitengo, Watumishi na  Wadau wote waliyoshiriki maonesho hayo kwa sababu wao ndio chachu ya ushindi huo.
Read more »